TREMOLLIA vel TREMOLIA vulgo LA TREMOUILLE

TREMOLLIA, vel TREMOLIA, vulgo LA TREMOUILLE

nomen Principatus, in Gallia; olim Dominii. Fuêre autem Henrici de Tremolia, A. C. 1647. hi tituli: Henricus Tremolliae Dominus, Toarcis Dux et Par, Turris Talemundi Princeps, Spineti Marchio; Vallis; Montis Fortis, Gisnarum, Benaonis, Taliaburgi et Ionvellae Comes; Redonum Vicecomes; Vitreii (Vitre en Bretagne) Mali Leonis, Turris Berugiae ac Didonnae Baro. Hadr. Vales. in voce Turris Talemundi. Inter illustres in Francia stirpes merito familia Tremollia iam diu memoratur, et ob iura, quae praetendit in successionem Friderici Aragonii Regis Neapolitani, singulari ante multas alias praerogativâ in patrio regno gaudet. Deductio eius continua ostenditur a Petro Domino de la Trimoville A. C. 1046. Saeculô decimô quartô Comitatus de Ioigny in illam illatus est, sed mox iterum inde emigravit. Circa idem tempus successio Suillia et Craonia, herede Mariâ a Guidone ductâ, nec minus Vicecomitatus Toarcius, atque Principatus Talmontius, a Margareta Ambosia, Ludovico Tremolio nuptâ: Tandem quoque Lavallea hereditas, cum supra memorata praetensione Aragonica, ab Anna Francisci Tremollii uxore, genti obtigit. Ex his vero duobus tres filii orti sunt totidem linearum conditores. A minoribus enim Georgio et Claudio descendunt Marchiones de Royan et (qui nunc Ducalem titulum aslecuti sunt) Noirmoustier. Primaria vero linea a maiori filio Ludovico, primo Duce Toarcio, derivatur: qui, mortuus A. C. 1576. ex Ioanna Montmorancia, reliquit filium Claudium, ex Carola Brabantina Nassovia Patrem Henrici, quô, et Mariâ Turriâ, geniti sunt, Henricus Carolus Princeps Tarenti, maritus Aemiliae Hassiacae; Ludovicus Mauritius Comes Lavalleus, Abbas de Charroux et Maria, uxor Bernardi Saxoniae Ducis: e quibus, Henrico Carolo uxor peperit Carolum Belgicum Hollandum D. de Thovars (natum 1655.) — Principem de Talmond. Carolam Aemiliam etc. Vide Phil. Iac. Spenerum,

Theatrô Nobil. Eur. Part. I. P. 93. et in Ind. Part. II. p. 121. nec non Arte Heraldicâ, Tom. II.